என் அறையில்
நான் மட்டும் வசித்து வந்தேன்
நான் என்னோடு
என்னைக் குறித்துப் பேசி வந்தேன்
ரமணரின் படம் ஒன்று
எனக்குப் பரிசாகக் கிடைத்தது
என் அறையில்
நானும் ரமணரும் வாழ்ந்து வந்தோம்
நான் ரமணருடன்
என்னைக் குறித்துப் பேசி வந்தேன்
சில நாட்களுக்குப்பிறகு
என் அறையிலிருந்து
நான் வெளியேற வேண்டும்
என்று ரமணர் விரும்பினார்
அது என் அறை என்பதால்
நான் வெளியேற மறுத்தேன்
எனவே
ரமணர் வெளியேறினார்
என் அறையில்
ரமணரின் படங்களுடன்
நான் மட்டும் வாழ்ந்து வருகிறேன்.
#ஜான்சுந்தர்
விடுதியிலிருந்து
விடுதிக்கு மாறி
விடுதிகளிலேயே
வாழ்ந்து வந்த
விடுதி மனிதனின் பயணம்
உள்ளூர் விடுதியில்
துவங்கும்
வழியூர் விடுதியில்
தூங்கும்
விடுதிக்கும் விடுதிக்கும்
இடையில் கிடந்துருளும்
அவனது நாட்கள்
இப்படியே
சன்னலில் இருண்டு
கதவுகளில் விடிய
விடுதி மனிதன்
விடுதிகள் அலுத்துப்போய்
வீடு தேடிப்போனான்.
வீட்டை வைத்திருந்தோர்
சேர்ந்து வசிக்க
பெண் வேண்டும் என்றார்கள்.
பெண்ணை வளர்த்து வந்தோர்
சேர்ந்து வசிக்க
வீடு வேண்டும் என்றார்கள்.
விடுதியறைகளே
வாழ்வதற்கும்
தேவைப்பட்டால்
சாவதற்கும் கூட
அனுமதிக்கின்றன
என்கிறான் விடுதி மனிதன்.
மேலுமவன்
விடுதியில் பிறந்தவன்
விடுதியில் தானே
இறக்க வேண்டும்
என்று வினவுகிறான்
புகைப்படங்களில்
விடுதிப் பணியாளர்கள்
அவனது உறவின் முறையினராக
முறுவலிக்கின்றனர்.
#ஜான்சுந்தர்
தன்னைத்தானே
தட்டிக் கொண்டு உறங்கும்
சிறுமியைப் பார்த்து
உச்சு கொட்டுகிறார்கள்.
தலையில் இடி விழுந்த மறுநாளே
மயிரையள்ளிக் கொண்டையிட்டு
செங்கல் சுமக்கப் போனவளுக்கு
இது வியப்பில்லை
பெற்றதும் உடன்பிறந்த
மற்றதும் உதவுமென்று
தலையைச் சொறிந்து நிற்காமல்
தன்னைத்தானே
சவுக்கால் விளாசிக் கொண்டு
தட்டாமாலை சுற்றுகிற
மண்ணுருண்டையின் மகளல்லவா
#ஜான்சுந்தர்
