இசைஞனின் கவி அல்லது கவிஞனின் இசை

                                                                                                                                                         

*

இதுகாறும் மதுப்புட்டியை ஸோகரஸந்ததும்பும்

வயலினென்றே நினைத்திருக்க

வாய் பொருத்தி நீ சரித்த க்ஷணத்திலந்த

பியர் போத்தல்

எக்காளத்தையூதுங் கொம்பானதைப் பார்த்தேன்.

*

அடியில் கால் நுழைத்து பாதமழுத்தும்

மோகத்திற்கெதிராய்

ரகசியங்களை திறந்து காட்டி

அத்தனைப் பற்களிலும் சிரிக்கும் அவளொரு

வெட்கமில்லாப்  பியானோதான்.

*

தம்புராவின் உறுமலுக்கு

வாலைச்சுருட்டிக் கொள்கிறது

ஆன்மா.

*

கிதாரென்று

நீ நம்பிக்கொண்டிருப்பது

ஓர் அம்மணத்தை

*

உன் கையிலிருக்கும்

இந்த ஒலிவாங்கி

அரங்கம் ருசிக்கும்

ஐஸ்க்ரீமாகிவிட்டது பார்.