தினமொரு நிறக்குழம்பில்
முங்கித்திளைக்கும் பெயிண்ட் பிரஷ்
பிரபஞ்சத்தின்
திக்கெட்டுக்கும்
வண்ணம் பூசிவிட முடிவெடுத்து
விடியற்காலை ஐந்துமணிக்கெல்லாம்
பொள்ளாச்சியிலிருந்து பஸ்ஸைப்பிடித்து விடுகிறது.
எப்பேர்பட்ட அவமானத்தையும்
துடைத்தெடுத்துவிடும் டர்பைன்டாயில்
தன்வசம் இருப்பதாக பீற்றிக் கொள்ளும்
அந்த நாலு இன்ச் பிரஷ்
நாள்பட்ட காயங்களை
சுரண்டியெறியும் பட்டித்தகடு ஒன்றையும் உள்ளாடைக்குள் ஒளித்து வைத்திருக்கிறது.
பிரஷுக்கொரு கைப்பேசியும்
கைப்பேசிக்குள்ளொரு வரவேற்பறையும்
வரவேற்பறைக்குள்ளொரு சிப்பந்தியுமுண்டு
சிப்பந்தி இளையராஜாவுக்கு மாதம் பதினைந்து ருபாய் சம்பளம்.
வாடிக்கையாளர்களுக்கு இடைவிடாது பொன்னோவியத்தை வரைந்து காட்டப்பணிக்கப்பட்டிருக்குமந்த அடிமைக்கு
ஆண்டையும் அடிமை.
ஞெகிழியுறைக்குள் பத்திரப்படுத்தியிருக்கும்
குட்டி பிரஷ் வரைந்த சிறுவர்மலர் பக்கத்தை
காட்டும்போது துளித்தண்ணீர் சொட்டுகிறது பிரஷிலிருந்து.
சிற்றுளியும்
பொடித்தூரிகையும்
மயிற்பீலியும்
உண்டுறையுமிப்பேருலகில்
ஒரு நான்கு அங்குலம்
காலியில்லையா
நீலவண்ணா
_ மணல்வீடு
.jpg)
